擺西班牙世盃冠軍陣

猪拉多纳

巴塞炒起切爾達

上仗喺聯賽大炒華歷簡奴5蛋嘅巴塞隆拿，今晚喺西甲主場迎戰切爾達，出爐歐洲金靴獎得主、快將榮升爸爸嘅美斯又踢得，而且以韋拿為首嘅「狂牛兵團」進攻線其實威力一樣驚人，即使巴塞要讓「-2」，都照捧1.7倍「讓球主勝」啦！

（now632台周日凌晨1:00直播）
維蘭路華遇舊東家要攞彩

唔講唔知，巴塞教頭維蘭路華球員時代曾經効力過切爾達3季，不過只上陣過29場並攻入1球，最後更黯然離隊。今次維帥同舊東家交手，點都唔想失威，球員梗會搏命幫老細攞彩。講番場波，美斯雖然尋日陪老婆生仔，但最新消息話佢會落場，何況冇咗佢就火力差咩？小妹唔多認同囉！查實即使冇美斯，前線將會由逐漸回勇嘅韋拿，拍住法比加斯同柏度洛迪古斯攻堅，中場則由沙維、恩尼斯達同布斯基斯支撐，呢個咪幾乎係西班牙贏歐國盃同世界盃個陣囉，唔通炒唔起切爾達咩？

再睇番切爾達，今季聯賽客戰係4戰4負共失8球，真係衰到冇朋友o架。加埋今仗佢哋仲有中場卡比爾停賽，後防又有拿祖恩沙同森美爾洛卡養傷，中門大開，仲點頂巴塞吖！