不來梅抖夠大起緬恩斯

猪拉多纳

上周中德國盃超級正氣，12支德甲球隊當中，除慕遜加柏因同級內訌輸畀杜塞爾多夫外，全數晉級第三圈！今屆德國盃大家都咁認真比賽，多蒙特要衞冕真係困難重重。雲達不來梅就係少數上一圈已出局嘅德甲球隊，今晚主場對住緬恩斯，小妹就睇好係「大」戰一場啦！

（有線61及201台周一凌晨零時30分直播）
上周中免戰德國盃

不來梅今季成績麻麻地，估計今晚都踢得幾吃力，不過不來梅好在有兩個球員最近弗番，先講前鋒尼斯彼德臣季初踢得好差，最近終於連入兩球頭槌，話唔定已經「頂」番個信心返嚟，仲有退居中場嘅阿拿奧杜域睇嚟已經適應位置，今季多次助攻建功，再加上中場肯特係緬恩斯剋星，經常對住客軍有波入，今晚對不來梅嘅合理要求至少都要射破網。

其實論往績交手真係一面倒，不來梅近5次對住緬恩斯只係1和4負，但緬恩斯上周中踢完德國盃，體力點都比較輸蝕，所以都唔敢投佢哋信心一票，惟有希望佢哋保持入球多嘅走勢，球隊近4場已經射入8球，而且箭頭施沙拉爾今季已經射入7球，絕對要留意。今晚希望雙方都不設防，合演一場「大」戰啦！