雷阿倫「火」上加油

猪拉多纳

好多人都知Peter係籃球「粉絲」，而新一季NBA近日已正式開鑼，Peter當然有留意，究竟邊隊可以贏總冠軍，現階段可謂言之過早。球迷們要知道賽季係好漫長，任何事情都可以發生，就好似湖人咁，開季已經連輸3場，表現的確令人失望，但高比拜仁就叫大家畀少少耐性及時間，始終都係新埋班，默契仲未建立。而且湖人部分球員仍未谷起作戰狀態，睇落只得7成左右，但只要佢哋狀態一到位，好快就會交番出好成績。至於熱火有幾勁就唔使多講，今季有埋射手雷阿倫加盟，實力可謂進一步提升，其實熱火能否成功衞冕好睇「熱火三寶」，如佢哋打到去季後賽都冇傷冇病的話，熱火再贏冠軍都唔出奇。
余理洋港籃超新星

至於香港籃壇方面，早前豪情喺領隊呂少文英明領導之下，以大比數114比54狂勝教聯贏得康文盃冠軍。其實籃球及足球都一樣，好需要互相合作為團隊爭取好成績，而呂少文領隊就好識利用team work嘅威力，令球隊發揮得淋漓盡致。當然，豪情能夠贏得冠軍，球隊懂得挑選好球員以及場內調配都好重要。實在豪情陣中包含晒港外老中青球員，比如翁金驊、宋方、張志豪等等。而Peter就較留意到一位23歲球員余理洋，呢位由加拿大回流嘅球員技術好全面，相信假以時日一定可以成為港籃壇嘅超級巨星。
金句：豪情專業奪標歸，以籃代足講一周。