拉科鬥心強碌「卡」搶分

猪拉多纳

今晚西甲有拉科魯尼亞主場迎戰「小島球隊」馬略卡，拉科開季第一場贏過奧沙辛拿之後，近8場未嘗一勝，但表現其實唔算好差，始終人腳所限，唔可以強求太多，只要每場波交足貨，球迷係有眼睇。相反馬略卡近排演出真係走晒樣，上個月踢4場輸足4場，近況差加埋今晚作客，想唔輸都幾難，拉科1.8倍主勝抵玩。

（now632台周日晚11:00直播）
馬略卡西甲4連敗作客腳軟

曾幾何時係歐聯常客嘅拉科，依家要用新升班嚟形容真係有啲唔慣，佢哋依家喺聯賽榜排緊尾3，真係有搶分需要，唔係遲啲多個名叫「升降機」！其實今季幾欣賞拉科球員嘅鬥志，尤其作客華倫西亞同主場對巴塞隆拿，即使技不如人早早落後都冇放棄，一人走多步將比分拉近甚至逼和，自打出4:5輸畀巴塞嘅「代表作」後，近兩場聯賽都有分落袋，今晚主場出擊就食住呢團火，隨時有3分落袋！

馬略卡一向靠主場搶分，今季3場勝仗都係嚟自主場，相反作客就未贏過。最慘係班波近況勁唔掂，10月份連輸4場，包括主場畀皇家馬德里狂數5球，近3場聯賽合共失咗10球，好似陪緊太子練波咁，士氣進一步受挫，今晚作客真係輸少當贏。
張峰來料：拉科魯尼亞（主勝）