獨立隊唔齊腳難出生「天」

猪拉多纳

聽朝南美球會盃8強次回合有嚟自智利嘅天主教大學主場迎戰阿根廷球隊獨立隊，客軍近排黑仔到爆，前、中、後3線都有主將受傷，作客士氣極盛嘅「天大」實在難以全身而退，小妹力捧1.92倍主勝。

（有線61及201周五早上6:15直播）
天主教大學講明夫添爭晉級

黑到爆嘅獨立隊家陣三線都傷兵滿營，後衞莫雷洛迪古斯、中場巴堤安、維拉芬尼斯、前鋒法利亞斯同歷古森蒙全部唔出得，連小將李安尼畢特都喺上仗處子登場1分鐘，就因為膝部韌帶撕裂打柴，實在相當唔好彩！佢哋唔夠人用之下更喺上場聯賽輸畀拉魯斯，令7場不敗走勢告一段落，愈踢愈頹下聽朝造訪智利都幾難有好結果。

天主教大學雖然連和2場，但佢哋喺首回合作客獨立隊時，憑精彩嘅進攻足球逼和對手踢成2:2，今場賽和1:1都照入到4強，更犀利嘅係佢哋短短3日內再喺智甲嘅「大學打吡」作客智利大學，雖然只能賽和0:0，但仍然造出唔少攻勢踢到勢均力敵，教練拿沙迪仲話今次為咗晉級肯定唔會留力，試問天殘地缺嘅獨立隊又點頂先？

首回合：天客和2:2
南球盃賽制

採主客兩回合淘汰制，今輪為8強次回合，若總比數相同，作客入球較多一隊晉級，再和的話毋須加時，直接於次回合後隨即互射12碼決勝。