米堡大龍鳳捉貓頭鷹

猪拉多纳

米杜士堡減主場票價、又誠邀250名當地軍人入場打氣，就係希望強勢贏波，暫坐一哥位置！今晚米堡主場迎戰錫周三，雖有安尼斯、活基治等主力缺陣，但史葛麥當奴弗到爆，近期勝仗連連夠晒火氣，「貓頭鷹」今次插翼難飛，要主W！

（周六凌晨3時45分開賽）
錫周三作客腳軟

米堡近期氣勢如虹，雖然上仗作客同諾定咸森林互交白卷，打斷6連勝強勁走勢，但事實上該仗米堡踢得好醒，整體演出並冇跌Watt。雖然有兩大主力出唔到，但史葛麥當奴極度生猛，加上麥伊治蘭於中場派牌，米堡實力絕對於對手之上。

目前米堡比榜首水晶宮少一分，如果今仗贏波就可暫做一哥。球隊對此期望已久，故特登將成人波飛減到12鎊，預料今仗會有超過2萬「米粉」入場，將為愛隊全場打氣。另外，球會亦邀得250個當地軍人及其家屬入場，並於開賽前向佢哋致敬。2010年4月，米堡對錫周三賽前都有同樣部署，最後順利贏1比0，建功球員正正係史葛麥當奴。球會做晒大龍鳳，球員當然識做，將出盡真功夫求勝。錫周三作客戰鬥力大打折扣，無論入球率同不敗率都低，捧主W！