禾堡利華新帥大激鬥

猪拉多纳

今晚英超同德甲都分別有好戲上演，而曼城對熱刺更有3D直播提供，如果各位有3D電視嘅球迷又可以預備定你副立體眼鏡啦！當然鹹魚青菜各有所愛，有得揀球迷先係老闆，無咁大眾口味嘅德甲今晚都有禾夫斯堡對利華古遜，兩隊都由新帥領軍而且表現大有改善嘅球隊對賽，必有一場「大」戰。

（有線61及64台周日晚10時30分直播）
利華中後場多傷停

多得名氣搭救，教練馬加夫都算係炒得遲了！呢幾年禾夫斯堡無甚佳作，但喺轉會巿場就花咗成億歐元！明明球隊實力不俗，球場上各人卻格格不入，總係搵唔到一個發揮整體嘅陣式，而且馬加夫一直以高壓手法管理球隊，如此一「炒」，球員們實在如釋重負！高斯拿呢位代教練至今領軍數場，雖然球隊無180度轉變，但球員心情明顯較為放鬆而且更能發揮所長，相信今晚奧歷、巴斯杜斯、迪亞高等攻擊大哥都可以有所斬獲，當然小妹都希望長谷部誠今晚都有好表現啦！

利華更唔使多講，自S利雲度夫斯基同希比亞上任後，球隊成績同表現都穩步上揚，歐霸盃更已經提早出線，而最近傑斯寧表現回勇更係利華入波尖刀！可惜利華今晚中後場傷停滿營，一對中路守將先有路菲斯停賽，又有連拿度奧古士圖又受傷，削弱嘅利華嘅防守能力，小妹對佢哋作客取勝不存厚望，反而看好多入波。
Kit 推介：禾夫斯堡　入球大