多名利级数够照

猪拉多纳

　　呢期係大赛日，点都轮到大马房威威，摩廐已成众矢之的，如果呢个马房今日成绩平平，除了阿栋之外，相信好多马友亦会大跌眼镜。话时话，由於大赛日关係，热门实力马点都要秤高啲，冇办法，呢啲好似係潜规则，总之，今日唔係大雨淋漓，应该会连场热门收场。

　　第四场三班1200米。「惊雷」今季跑两场都入Q，之前输畀「事事顺意」，可能係初出及形势不利，而上场升上三班面对「山顶」一样跑得出色，假如终点位移後一步，战果已经改写，事关佢在末段真係衝得好劲。呢次冇咗强敌，虽然仍有匹「小母牛」，唔知对方咩底细，不过，「惊雷」已有一场三班赛经验，较可靠。

　　首饰多宝愈长愈好

　　第五场四班1600米。「首饰多宝」初出判定最多七八成状态，有本事直路飞出大外档杀入第二名，唔係质素使然，我睇唔到会有另一原因。睇长相，呢匹马将来可能愈长愈妙，2000米有机会扳到，依家加程至1600米係起码路程，蔡廐马向来愈跑愈好，可望补中。

　　第七场二级赛2000米。「多名利」上场入Q吓亲人，出闸慢、途中遇意外，有本事在直路狂追，呢啲咪级数囉。转战2000米比中距离好跑好多，细马唔使负重，亦对战鬥力大有帮助。呢场盃赛我认为大摩未必只着重「包装博士」，呢匹上届皇太后盃盟主，同样有问鼎之力。