CF格蘭納達 60年代「巨人殺手」

猪拉多纳

CF格蘭納達可謂近年西甲嘅「穿梭機」，只係花咗短短兩個球季，就由丙組升上甲組，其實佢哋早喺60年代已經喺西甲有過一段美好時光，更曾兩次以聯賽榜第6完成球季，亦試過擊敗皇家馬德里、巴塞隆拿同畢爾包等強隊，因此獲得「巨人殺手」稱號。

上季CF格蘭納達非常難捱，幸好最終成功保住西甲席位，球隊今季作出頗多變動，係轉會市場上最活躍嘅球隊之一，後防有奧迪斯同巴西球員艾恩尼加盟，實力略有提升。雖然新教練安基拿甲組經驗欠奉，然而帶領球隊發揮四平八穩，上周更喺作客情況下擊敗宿敵貝迪斯，表現令人另眼相看。

其實成隊波當中，筆者最欣賞嘅係中場米基爾列高同前鋒艾亞比。前者有跑不完嘅氣力，令CF格蘭納達贏到中場優勢；後者貴為球隊史上最昂貴嘅球員，亦係摩洛哥國腳，喺効力卡昂時期，筆者評述法甲比賽已對佢留下深刻印象，速度快同把握能力強令佢成為球隊反擊武器。不過，呢隊波最大問題在於主場成績欠佳，只係贏過1場，今晚對住前列球隊馬體會，難免全失3分。