曼聯收夠籌捧對家

猪拉多纳

曼聯1958年歐聯後返國發生慕尼黑空難，卜比查爾頓係其中一位當年生還、而如今尚在世嘅幸運兒，另一位幸存者係當年年僅十九歲就成為主力嘅威爾斯翼鋒堅尼摩根斯，退役後佢都不時出席曼聯活動，舊年空難五十周年紀念活動都有出席。不過，呢位名宿前日因病過世，終年73歲。唔知佢嘅離世，會唔會影響曼聯上下今晚出戰歐聯嘅心情呢？

今晚「紅魔」喺H組賽事要作客去到土耳其加拉塔沙雷出名嘅「地獄主場」，但曼聯之前嘅四場分組賽贏晒，已手握12分肯定出線，今晚冇理由搏，而其餘三隊加拉塔沙雷同克盧日有四分、布拉加三分，分數好接近，由於只係剩番兩輪比賽，三隊仲有得爭，肯定每一隊都好想爭到呢組另一個出線席位。

唔少莊家都開出今晚加拉塔沙雷讓「紅魔」平半，可見主隊被睇好。佢哋喺組內同克盧日同得四分，不過就排到第二位，所以今晚一定有戰意。
加拉塔沙雷盡地一煲

加拉塔沙雷話晒都係土耳其超級聯賽一哥，人腳質素唔錯，分組賽入過四球嘅布拉卡爾馬斯今季腳風超順，重有烏密布魯特亦有狀態。中場有前拜仁嘅咸美艾天托普同埋効力過祖雲達斯嘅巴西中場菲臘比美路，後防有前阿仙奴嘅伊保爾，主力基本上都有豐富大賽經驗。球隊本身今季鍾意大打進攻足球，首循環作客奧脫福都只係輸0比1，今晚有出線目標兼喺主場踢，要贏波絕對唔出奇。

曼聯上周末聯賽輸咗畀諾域治，依家畀曼城壓住排第二，當然將個注意力放多些少落聯賽度搶分，好過搏呢場無謂比賽啦！所以睇形勢，就算我係「紅魔」迷呢場都會買佢對家呀！

（有線64及204台周三凌晨3時45分直播）
Wendy推介：加拉塔沙雷 勝