巴塞執靚防線圍攻莫斯科

猪拉多纳

今晚歐聯有早場直播！巴塞隆拿喺上輪歐聯不敵些路迪之後，喺G組嘅領前優勢得番2分，不過隨住佩奧爾同布斯基斯復出，今晚遠征俄羅斯大戰陣容天殘地缺嘅莫斯科斯巴達，唔難大勝一仗，1.67倍「讓客」要捧！

（有線61、64、201、204及中央5台周三凌晨1:00直播）

巴塞上場以3:1擊敗薩拉戈薩，創下西甲最佳開季紀錄，但對於今季失球偏多，恩尼斯達接受《體育報》訪問嗰陣都承認有改善必要，但隨住碧基同佩奧爾呢對中堅拍檔再度合作扼守中路，又有防中布斯基斯坐完波監復出，做防線第一道屏障，恩尼斯達點出嘅問題可以立刻解決。法比加斯雖然帶錯護照搞到入境俄羅斯受阻滯，不過最後成功過關，相信對備戰影響唔大。
斯巴達要用4號門將把關

由於已經踏入11月中，相信大家最關心都係莫斯科有幾凍，按照預測比賽期間將大約係攝氏零度左右，講真喺俄羅斯嚟講唔算十分難頂，但最搞笑係巴塞一眾球員仍然煞有介事，帶咗極多禦寒物品隨隊，搞到行李過重被罰錢。

莫斯科斯巴達主帥艾美利喺西甲成名，不過當日執教艾美利亞同華倫西亞嗰陣，對巴塞未贏過之餘，仲冇乜球員可用，事關今戰有中堅柏利查停賽，箭頭韋列頓、隊長沙治柏舒夫沃、比耶列甸洛夫、羅姆路同艾登麥基迪成班主力傷晒不特止，就連3號門將艾迪列布夫都啱啱打埋柴，今晚要用4號門將迪尼馬把守最後一關，就算前鋒艾文歷基傷愈，對住巴塞邊有得打！

歐聯G組