多蒙特搏命做大「士」

猪拉多纳

多蒙特家陣喺歐聯D組坐頭位，搞到班球評家大跌眼鏡，尤其係多蒙特喺呢幾場波表現極佳，雖然佢哋今晚作客阿積士和波都肯定足夠出線，不過班「蜜蜂仔」勝在夠勤力夠搏，1.75倍客勝有啲分頭，抵捧。

（有線62及202周四凌晨3:45直播）
多蒙特「羅拔仔」要做亨利

踢法機動嘅「蜜蜂兵團」喺死亡D組拎到2勝2和佳績，暫時以1分壓過皇馬做「1哥」，成績超乎預期。事實上，多蒙特喺作客曼城同皇馬嗰兩場波都係靠馬高列奧斯先開紀錄，只係喺比賽末段被逼和，可見呢班「蜜蜂仔」真係唔嘢小。今晚對手換上同組實力最弱嘅阿積士，除咗話有上仗傷愈復出嘅巴拉斯塞高斯基繼續候命，仲有話要以亨利為榜樣、近兩場入波都起孖嘅羅拔利雲度夫斯基擔正攻堅，鋒力強勁，要入波話咁易啦！
阿積士艾歷臣講明離隊

目前以4分排第3嘅阿積士，想出線嘅話今場一定要搶攻，原本傳奇門將雲達沙擔任球會市場總監沖喜吓係好，點知轉個頭嗰件20歲嘅丹麥超新星基斯甸艾歷臣，竟然喺傳媒面前發表離隊宣言，仲拋低一句「我冇講過淨係會踢西甲，英格蘭同意大利我都鍾意！」擺明話畀大家知，佢下季一定要離隊啦！軍心受損，加埋翼鋒賴恩巴布受傷，點擋得住多蒙特呀！

歐聯D組