堤格雷神經主場得米

猪拉多纳

明早上演兩場南美球會盃4強首回合，尾場阿根廷堤格雷主場對哥倫比亞米倫拿列奧，堤格雷都算「神經刀」，今季聯賽15戰未贏過，但踢南球盃卻有上佳表現，當中三場主場取得全勝轟入12球。齋睇聯賽成績，堤格雷輸幾條街，佢哋已跌至阿甲積分榜尾二，反觀米倫拿列奧係哥國聯賽一哥。不過聯賽同盃賽始終唔可以相提並論，從莊家開出堤格雷主W1.75倍，足證睇好呢支「盃賽殺手」可先拔頭籌。事實上，堤格雷今屆三場南球盃主場都淨贏對手兩球或以上，水準有保證。米倫拿列奧上圈次回合主場全靠於補時獲爭議12碼先至晉級，今仗作客恐怕難再獲眷顧，捧主W。

（有線61及201台周五早上8時45分直播）

頭場智利球隊天主教大學主場對巴西聖保羅。天主教大學先後淘汰巴西戈亞尼恩斯、阿根廷獨立隊，唔可以睇小佢哋，而且佢哋都係靠主場一役贏波先至晉級，因此今仗勝負對於「天大」能否打入決賽產生極關鍵影響，以「天大」近七次主場六勝嘅強勢，無懼聖保羅來犯。
聖保羅「智」取大盤

聖保羅上圈以總比數7比0大炒智利大學，今仗再鬥智利球隊自然信心十足。由於巴甲聯賽爭標已塵埃落定，聖保羅可集中力量爭南球盃，今仗就算贏唔到，都希望爭取作客入球，今場首選大盤。

（有線61及201台周五早上6時15分直播）