佩斯卡拉10件打柴

猪拉多纳

托迪帶住 羅馬回勇搶W

唉，點解去到邊都見到衰人o架？小妹近排因為工作問題搞到唔多開心，唔係認叻，小妹一向出晒名係「效率王」，好多工夫一早就搞掂晒，咁冇嘢做，咪準時收工囉，好正常啫，點知有位日日開OT嘅「好同事」，竟然話我蛇王兼清閒囉！喂，你自己喺開工時間做私人嘢不特止，仲要一邊傾電話一邊Hea做，咁梗係做唔切啦！小妹唔係老細，我話知你唔做吖，只係我覺得河水不犯井水，你搞掂自己先好話人啦！
佩斯卡拉插水教頭唔撈

做人最緊要心胸廣闊、知情達理，好似佩斯卡拉前教頭史杜柏咁，佢見隊波畀佢搞到一鑊粥咁，竟然自己主動請辭唔撈，一個崩賠償都唔要，淨係話想騰多啲時間出嚟，等接任嘅新帥盡快執番好隊波，呢啲咪係好人囉！

不過現實還現實，佩斯卡拉都真係幾大鑊，連埋上仗0:1不敵錫耶納，佢哋近7戰錄得5敗，狀態曳到喊，最慘係佢哋嘅傷兵成籮，正選門神沙維朗尼、防線主力泰利斯、基斯辛斯、中場華迪美韋斯、加斯頓保格文、基斯比哥路斯同巴拉斯全部打柴，兼埋仲有中場卡斯奧尼、守將辛安同馬高卡佩安奴停賽，足足10件唔踢得，今晚主場要硬撼羅馬，就算換莫連奴教都唔掂啦，更何況係冇乜領軍經驗嘅比高迪呀？
托迪無私精神感動球迷

對家羅馬就唔同喇，佢哋喺上仗聯賽以2:0輕取拖連奴，近況回勇，小妹都有上網睇呢場波，見到年屆36嘅托迪，仍然不惜氣力咁走上走落帶住隊波，最感動係佢被換出嗰陣仲係0:0，但托迪一啲怨言都冇，乖乖咁坐番去後備席，當呢位「羅馬大佬」見到奧斯華度打開紀錄，仲開心到歡呼喪嗌，幾乎想衝出場同隊友慶祝咁滯，呢種無私精神，真係令小妹堅感動！好，Sherry決定信多羅馬一次，撐1.56倍客勝！
微博傳情：好掛住機場朋友呀！

雖然小妹唔多Like啲同事，但一單還一單，我個老細真係好好人好Nice嘅，小妹真心尊敬佢，好似上星期佢搞咗個生日P，小妹都有去捧場o架！不過講到開心，咁就梗係以前份工好好多啦！各位機場朋友，你哋有冇掛住我呀？
Sherry推介：羅馬（客勝）