薩克達保「首」 祖記志在出線

猪拉多纳

薩克達主場對祖雲達斯「好和味」！薩軍已獲出線權，今仗唔輸即穩奪小組首名，可避開其他組首名勁旅。祖記和波亦可晉級十六強，對兩隊而言，打和等同雙贏，何樂而不為。和波賠率不斷跌水，初盤已壓低至1.9倍，仲下降至截稿時1.85倍，可以考慮跟莊家手影，搭順風車跟買和。

（有線63及203台周四凌晨3時45分直播）

上輪賽事結束後，已廣傳今場會和氣收場，雖然有聲音要求兩隊必須尊重體育精神，盡全力一戰。不過喺金錢掛帥嘅歐聯，球隊面對龐大經濟利益，恐怕雙方已掩住雙耳。尤其係薩克達本身都唔係咁注重體育精神，陣中射手雷斯阿祖安奴上輪竟然將公正球射入網就係最佳例子。結果佢今場被罰停賽，薩克達失去破門利器，想贏唔易，不如穩陣打和好過。

祖雲達斯更加唔輸得，只求出線，冇必要冒進博小組首名。事實上，以意大利球隊保守傳統，呢種關鍵時刻難免大打守勢波。祖記近年喺歐洲賽贏波率偏低，包括歐霸盃在內，試過連續九場歐洲賽和波，直至上月主場擊敗洛斯查蘭特先至重敲勝鼓。再者祖記今屆兩場作客都打和，今場正係佢哋發揮「和波專家」本色嘅時候。