賀芬咸新官執到堡

猪拉多纳

炒巴布一天光晒

德甲獨腳戲由黑柴兩支最有感情球隊對決，漢堡主場迎戰賀芬咸，客軍啱啱炒咗教練巴布，球隊大營氣氛大幅轉好，預期今晚演出會有改善，唔赦人腳不整兼攻力有限嘅漢堡，賀芬咸受讓平半撐下盤。

（有線64及204台周六凌晨3時30分直播）

賀芬咸今季組軍認真，巴布更加係球會贊助人霍普心儀已久嘅主帥人選，季前對成績期望甚高，可惜巴布同球員間嘅溝通一直有問題，用人又欠缺耐性，導致球隊內部氣氛凝重，近期士氣更愈踢愈差，防線不斷犯低級錯誤，上仗主場大敗於雲達不來梅腳下，已累積四連敗，球隊最終都要作出換帥決定。

今場佢哋由U23教練基拉馬暫掌帥印，佢接手後立即同球員詳談，決心改善球隊氣氛，而且今仗排陣用人亦作出調整，將會收起近期表現極差新人舒普洛克、舒洛克同史卓加，重新重用羅拔圖法明奴同宇佐美貴史，加上中場大將施巴施坦魯迪停賽期滿復出，球隊人腳合理番好多，黑柴相信佢哋今仗演出會有大幅改進。
漢堡新尖刀缺陣

漢堡方面，球隊本身人腳已經唔夠平均，較早前靈魂人物雲達華治受重創後，近期前線極倚賴新星比斯達策動，佢近兩場都為球隊首開紀錄，不過今仗因為腿筋受傷缺陣，令漢堡進攻線冇晒領軍人物，今晚面對新官上任三把火嘅賀芬咸，就算主場都讓唔起波。