愛華頓讓波危危乎 捧熱刺

猪拉多纳

默西賽德郡雙雄弱勢信唔過

今晚英超焦點當然落喺曼市打吡呢場大戰度啦！不過呢場波早開，散場後仲有唔少餘興節目，好似默西賽德郡雙雄愛華頓同利物浦將分途出擊，但兩隊波嘅近況都麻麻，加上對手熱刺同韋斯咸都係豬頭骨，而藍、紅兩軍咁多隱憂仲要齊齊讓波，(火羅)味甚濃，一於齊齊反晒佢哋。

英超實力分子熱刺少帥保亞斯花咗近半季時間終於執靚隊波，大軍近期連贏4場步入正軌，佢嘅愛將迪科爾喺前線士哥停不了，成班波氣氛好番好多，今晚揮軍作客愛華頓，有力保持不敗，受讓要「讓球客勝」。

（有線301及201台周日晚11時直播）
保亞斯變陣空間大

保亞斯上季畀車路士球員搞走，今季去到另一間倫敦球會熱刺，同樣要處理人事問題，季初處於重整階段，可謂舉步為艱，經過幾個月磨合後，總算建立自家班底，除起用新兵丹普西及迪比利外，佢最醒係重用射手迪科爾，呢個英格蘭射手不獲上任教頭夏利列納信任，但保帥則視佢為No.1射手，令迪科爾仆心仆命場場搏，近期佢着晒火瘋狂入波，保帥真係獨具慧眼。

熱刺今場最大缺點係缺少王牌球星加里夫巴利，呢位左腳王爆得射得傳得，唔在陣中搞到得番艾朗連儂一隻翼，側擊力難免減弱。不過，丹普西上場歐霸盃偏左踢落都幾有威脅，保亞斯仲可以用另一新兵基菲爾施古臣試試，雖然效果點都唔夠用加里夫巴利咁好，但起碼叫做有得變，再唔係就索性打「442」，搵艾迪巴約拍住迪科爾，點變都好，中前場進攻火力仍然強勁。
拖肥糖近9戰僅1勝

「拖肥糖」愛華頓今季主場未嘗敗績，睇績梗係犀利啦！但佢哋近排前線過分倚重爆炸頭費蘭尼爭取士哥，呢個高佬確係好屈機，但用來用去都係得呢招，好易畀人睇死。「拖肥糖」始終都係一支受讓好過讓波嘅球隊，對上兩場鬥阿仙奴同曼城踢得好，最後都只係和波，其實佢哋近9戰只係贏得1場，勝出率實在太低，今場若然谷得太前搶攻，恐怕會畀熱刺快速反擊打謝，想贏波絕對唔易，要讓波當然揀熱刺。