拿玻里夠料搵「米」

猪拉多纳

弗爆二哥作客撼三哥

今日意甲Ali集中同大家研究尾場國際米蘭主場鬥拿玻里，聯賽榜三哥火併二哥，國米雖有主場之利，但近況唔及客軍，拿玻里不敗機會較高，甚至有機會贏埋，受讓平半捧下盤。

（周一凌晨3時45分開賽）

今戰雙方都係爭霸分子，其中國際米蘭自從上月初作客大勝祖雲達斯興奮過後，狀態竟然急速下滑，近期接連失分，較早前先後輸畀阿特蘭大同帕爾馬，主場亦只係賽和卡利亞里，目前已分別落後前兩名祖雲達斯4分同拿玻里２分，雖然上仗終於重響勝鼓，但主場只係靠對手一個烏龍波，至僥倖小勝巴勒莫，除咗防線冇較早前咁穩陣，中場創造力同前線把握能力都同時下降，尤其箭頭迪亞高米列圖，幾乎每場比賽都喺門前糟蹋大量入球機會，令佢哋有好多場波應贏變和，應和變輸。
國米森美爾停賽捧埋大

國米今季對強隊表現無疑好出色，先後贏過費倫天拿、AC米蘭同祖雲達斯，只係輸過畀羅馬，但喺目前狀態下面對老虎拿玻里令人擔憂，今仗後防大將森美爾停賽，教練施特拉馬斯安尼嘅三人防線被迫起用馬迪亞斯施維斯達代替，令防線更加唔穩陣。

拿玻里近4場意甲3勝1和狀態出色，上輪主場5比1大炒佩斯卡拉過程十分輕鬆，基於意識到聯賽爭霸機會愈嚟愈高，教頭馬沙利喺上周中歐霸盃對燕豪芬嘅比賽起用大量後備球員落場，結果主場都輸1比3，擺到明留力打呢場大戰，雖然今仗有中場迪斯馬利因傷缺陣，守將馬治奧同鋒將彭迪夫因傷上陣成疑，但整體實力受損唔大。

Ali認為拿玻里目前狀態明顯在國米之上，今仗作客贏面不在主隊之下，受讓值博，此外基於國米防線欠穩，入球大亦值得兼顧。
Ali 推介：

拿玻里下盤 ★★★★

拖連奴下盤 ★★★

國際米蘭大 ★★★