沙比仔一生一紅軍

猪拉多纳

今期《最佳男主角》犀利喇，呢個嘉賓攞過世界盃、歐國盃、歐聯同西甲冠軍，世界上唔係有幾多個做得到。係邊個？咪就係沙比阿朗素！呢位皇馬中場，係現世代少有睿智型球員；而且又重情重義，佢表明自己係一世利物浦球迷，或者下季有機會回歸晏菲路！

沙比仔雖然入波唔多，但傳送一流，係皇馬同西班牙必然正選，不過因為已31歲，佢同「艦隊」份約到2014年夏天就滿，但球會仲未同佢傾約，似乎對佢唔係太着緊喎！「我依家個腦淨係諗點同皇馬攞冠軍，其他嘢晏啲先算啦。」本季皇馬教練莫連奴廣受批評，但沙比依然對佢推崇備致：「莫帥係執教皇馬最適合人選，咁都仲要話佢，我真係冇說話好講。如果佢畀人鬧走，巴塞就掩住半邊嘴笑！」
同C朗冇乜兩句

已經過三張嘢，沙比思想當然成熟，早前佢公開表示，私底下同C朗冇乜偈傾，冇擔心過會影響球隊士氣﹕「做嘢還做嘢，你都唔會同個個同事都係老死啦！我同佢都好尊業，總之一落場，佢就係我好隊友。」C朗只係公事拍檔，但講起紅軍一眾舊隊友，好明顯就係好兄弟。

謝拉特曾公開表示，於場內場外都非常掛住沙比仔；05年紅軍勇奪歐聯後，兩個麻甩仔可以嘴對嘴錫錫嘅，可以諗到佢哋有幾friend。「我都好掛住佢，哈哈！喺利物浦踢咗5年，我個仔都喺利市出世，我對呢隊波好有感情，一有時間我就返去晏菲路睇波。」咁之後有冇機重返紅軍先？「我冇諗咁多，只可以講我一世都係紅軍粉絲，好掛住當地嘅一切。」依家有傳沙比仔下季會返去利物浦，係堅嘅話就開心死「利粉」喇！