蒙特雷射手扭計撐蔚山現代仲抵

猪拉多纳

世冠盃對任何球員嚟講都係夢寐以求嘅大賽，對非洲、亞洲球員更甚，可以話係上位舞台，其中有新鮮出爐亞洲足球先生李根鎬壓陣嘅南韓蔚山現代，今午對住有漢拔圖蘇亞素跳草裙舞嘅墨西哥球隊蒙特雷，1.57倍「讓主」要捧。

（有線61及201周日下午3:00直播）

球迷或者冇乜機會欣賞李根鎬嘅比賽，現年27歲嘅佢由於嚟緊要服兩年兵役，所以外流歐洲夢幾近幻滅，即係話今屆世冠盃就係佢足球生涯爭取踏上巔峰嘅最後機會，相信現代班球員都會盡力幫佢實現心願。
王牌漢拔圖蘇亞素拒續約

至於貴為中北美洲冠軍嘅蒙特雷，已連續第二年出戰世冠盃，大軍喺上周三已飛抵日本提早適應時差，不過陣中王牌漢拔圖蘇亞素最近搞搞震，公開否認會同球會續約，呢位得番半年約嘅智利射手擺明想走人，蒙特雷士氣唔慌好，試問點讓得起現代先！

今晚仲有場英超重頭戲，由曼城迎戰曼聯，「紅魔」上季輸畀死敵條氣一直唔順，今季有尹佩斯同朗尼呢對組合着晒火，作客未驚過，受讓平半撐曼聯！
頂占筍盤：蔚山現代（讓主）、曼聯（下盤）