新帥好腳頭 蝙蝠反彈再噬奧沙

猪拉多纳

自從華倫西亞易帥之後，成班波明顯脫胎換骨，佢哋今晚同奧沙辛拿再度交手，戰場由西甲變成西班牙盃都唔會有太大分別，畢竟奧沙辛拿傷兵滿營，點會頂得住重上軌道嘅「蝙蝠兵團」吖，呢場西盃第4圈捧客勝最正路。（開賽時間：周三凌晨3:00）
奧沙辛拿傷兵滿營

新帥華爾維迪一上任，華倫喺歐聯同西甲戰場齊齊奏捷，腳頭好到不得了。佢老人家亦好識講嘢，尋日記者會大讚班手足態度正確，兼且透露阿根廷防中加高嘅傷勢冇乜大礙，今仗可以落場搏殺。最重要係前鋒莊拿斯干卡維斯刑滿復出，射手蘇爾達杜近8場聯賽勁入6球，人齊士氣高，問你點頂？

雙方周日喺西甲交手，奧沙辛拿主場輸0:1，咪睇個比數好似好近，查實奧沙冇乜到肉攻勢，下半場落後緊都仲死氣沉沉咁款！又難怪嘅，中場索查、前鋒連奴同安歷基蘇拿仲抖緊，最好波嗰件翼鋒施斯干沙利斯亦因為韌帶撕裂提早收咧，陣容天殘地缺，照計都應該會衰多鋪喺華倫手上。
西班牙盃賽制

採主客兩回合淘汰制，今輪為16強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。