福島「+1」追擊千葉

猪拉多纳

為災民奮戰勇闖16強

天皇盃十六強有場賽事牌面睇落強弱懸殊，日乙前列球隊千葉市原主場迎戰地區球隊福島聯，單睇人腳市原梗係高好多啦！不過，福島聯今屆背負為災民而戰嘅信念場場搏盡，見關過關，今次有力延續夢幻之旅，蘇豪冷敲4倍嘅「讓球客勝」！

（周六中午12時開賽）

日本上年發生驚天大地震，引發福島核電廠事故，福島聯喺逆境中自強不息，今年成功喺地區聯賽取得升班席位，來季將會殺上JFL（日本第三級別聯賽）。與此同時，福島聯喺天皇盃亦表現突出，第二圈殺敗日乙冠軍甲府風林，第三圈更踢走日職球隊新潟天鵝，演出令人眼前一亮，佢哋一再喺越級挑戰情況下晉級，足見呢班波有心有力，今次對住市原牌面處下風，並唔表示佢哋冇得打！

千葉市原今季被視為日乙升班熱門，雖然取得升班附加賽席位，但最後都係失敗告終，又要等多一季。市原今屆喺天皇盃未受太大考驗，上圈對住日丙球隊佐川急便滋賀苦戰至互射十二碼先淘汰對手，演出只係一般，今場被捧成熱門難免令人有戒心。

福島聯喺晉級過程展現驚人鬥志，而且防守非常硬淨，今戰法定時間絕對有力保持不敗，除博「讓球客勝」外，亦可兼顧埋入球細。
櫻花靠土炮讓唔起心跳

同日大阪櫻花主場對清水心跳，喺日職結束後，櫻花多名外援已經走人，當中包括巴西名將森比斯奧，依家基本上得番批土炮，實力大打折扣。另一邊廂心跳王牌前鋒大前元紀已落實轉投德甲杜塞爾多夫，但會踢埋天皇盃先走，臨別秋波肯定分外落力，可助球隊殺敗櫻花晉級，受讓盤口有利，要「讓球客勝」。