圖盧茲迎馬賽 係時候反彈

猪拉多纳

今日阿King集中講法甲，直播賽事有圖盧茲主場鬥馬賽，唔好睇圖盧茲近3場贏唔到就以為佢哋狀態好曳，記得佢哋上次同樣喺被一致睇淡下大勝里昂，故此唔好睇少佢哋嘅反彈能力，而且馬賽近年面對圖盧茲往績亦唔算標青，平手盤阿King撐主隊圖盧茲。

（now 714周日凌晨零時直播）

圖盧茲連續3場聯賽贏唔到兼零入波，表面睇真係好難撐得落手，不過要留意佢哋上個月同樣曾經遭逢3連敗，結果喺對里昂嘅比賽中嚟個大反彈，大炒對手3比0，真係嚇你一驚。證明呢班波實力唔係想像中咁差。射手賓耶達今季腳風非常順，所入9個聯賽入球有7個喺主場取得，勢成客軍防線大患。

馬賽作客聯賽雖然錄得2連勝，但對手只係巴斯蒂亞、比斯特等下游隊伍，面對遇強愈強嘅圖盧茲料受考驗。圖盧茲近3次對賽1勝2和未輸過，平手盤捧得過。
尼斯強勢主W添食

另外兩場賽事，尼斯主場鬥伊維恩，尼斯主場5連勝，對手包括里昂、聖日耳門等勁旅，演出極有說服力，主W可捧。最後蘭斯主場鬥里爾，蘭斯已經連續5場聯賽冇波入，遇上近7場作客聯賽全開細嘅里爾，入球細係不二之選。