曼市雙雄 分途搶W 曼城齊心拆「紐」洩憤

猪拉多纳

打吡輸波谷埋成肚火

喺上周日曼市打吡臨天光輸波嘅衞冕英超冠軍曼城，家陣落後宿敵曼聯6分，要爭標，嚟緊1分都不能少。今晚佢哋造訪紐卡素，領隊文仙尼終於知衰，用番「打鵲英雄」泰維斯擔正，以佢哋近11次對紐卡素錄得9勝2和佳績，曼城今晚拆「紐」話咁易，我捧1.55倍客勝！

（有線200、204及300、廣東體育周六晚8:45直播）
紐卡素賓艾化缺陣

力奇雖然係「紅魔躉」，不過以波論波，曼城的確已進步到相同水平，上場輸波實在欠運，谷埋一肚火，今晚梗係想大炒對手洩憤啦！領隊文仙尼上場出巴洛迪利搵自己笨，到下半場換入「泰仔」，班波即時生番晒，臨尾雖然都係要輸，但起碼班波有火夠齊心先吖。今仗有望復任正選嘅泰維斯，歷來6次對紐卡素入咗4粒，配合阿古路攻堅，火力實在得人驚。仲有，曼城近年對住「喜鵲」可謂實食冇黐牙，11次贏9場擺明恰死「喜鵲」，就算佢哋今仗有中場巴利停賽，隊長高柏尼未必趕得切傷愈，但以佢哋充裕嘅人腳，冇有怕啦！

紐卡素今季大走樣，依家排第14，近6場英超輸足5場，班球員冇晒信心，最慘係佢哋件中場卡比耶因傷抖到出年，進攻發電機賓艾化又話大腿傷纏身多數缺陣，今晚就算主場出擊，睇怕都係等做曼城炮灰囉！