西維爾遇強「加」把勁

猪拉多纳

因上兩個星期要跟港隊出戰東亞盃外圍賽，唔可以同大家講波經，今日講波前想先分享吓呢兩星期港隊生活，要喺9日踢4場波，當中有勁敵北韓同澳洲，真係唔易應付，點樣盡快恢復體力更係一門學問，好似比賽後要坐喺冰水池10分鐘，之後一日又要去酒店泳池放鬆肌肉，真係想大叫「好凍呀」！

今次係一個好好嘅經驗，唯一令我奇怪係有球迷大鬧港隊球員，踢得唔好鬧好正常，但係由開賽第1分鐘就已經破口大鬧就有啲講唔通，希望入場嘅球迷對港隊多啲支持啦！
馬拉加作客例走樣

講番波經先，今晚西甲有場好戲碼，由西維爾主場迎戰馬拉加。論戰鬥力兩軍差唔多，但西維爾主場夠晒勁，尤其對實力分子往往打高兩皮，好似贏皇馬1:0、對巴塞都僅輸2:3，表現唔失禮。佢哋周中西班牙盃作客亦派咗5隻光蛋畀馬略卡，前鋒尼格度省2粒腳風唔錯。馬拉加近況唔差，可惜作客戰鬥力得番7成，今晚一於撐西維爾1.92倍主勝啦！

（now632台周日清晨5:00直播）
張峰來料：西維爾主勝