巴塞榜首戰「-1」有體頭

猪拉多纳

法卡奧單挑美斯 鋒雲色變

今輪西甲重量級戲碼，巴塞隆拿主場同馬德里體育會上演榜首大戰，呢場波唔單止關乎爭標，亦係美斯同法卡奧兩大射手王一決高下嘅舞台。前者剛打破梅拿年度入球紀錄，法卡奧上仗則個人獨建5功，兩部入球機器互轟，一定好睇過戲，況且雙方過往碰頭，經常合演入球騷，斯維認為巴塞勝算較高，入球大及「讓球主勝」玩得過。

（now 632周一凌晨4時直播）
二人士哥勝皇馬全隊

今季馬體會一改以往「皇巴」壟斷爭標局面，取代皇馬成為巴塞的最大勁敵，喺教頭施蒙尼勵精圖治下，「床單兵團」海鮮味大減，其穩守突擊更發揮得淋漓盡致，哥倫比亞射手法卡奧門前觸覺之銳利，頭頂腳踢12碼瓣瓣掂，淨係聯賽已經有16球進帳，在全隊圍繞佢做核心嘅戰術下，令法卡奧可專心喺禁區搵食，自然如魚得水，上輪大勝拉科魯尼亞仲個人省5粒，狀態弗到震。當然，今仗對手巴塞嘅級數同拉科冇得比，但呢個亦係對法卡奧嘅挑戰，佢當然想喺巴塞身上入波，證明自己身價。

巴塞的阿根廷球王美斯有幾勁唔使多講，淨係今年就轟入88球，打破梅拿年度入球紀錄，佢現時以23個士哥位列西甲射手榜首位，淨係睇美斯同法卡奧今季於西甲入球總和，就已經多過皇馬全隊（37球），都咪話唔恐怖。
馬體會追分實對攻

目前兩隊相差6分，馬體會如果贏波，仍有力從後趕上，戰意唔使懷疑，而巴塞當然亦想趁主場之利全取3分，進一步甩開對手，因此呢場「6分波」點睇都係鬥攻格。

睇番紀錄，兩軍近13次碰頭全部開大，雖然今仗大細中位數上調至3.5球，但雙方都咁好「大」喜「攻」，呢個大盤值得再追，而巴塞勝算較高，「讓球主勝」要得過。