車仔踩油衝刺 撞散哥連泰斯

猪拉多纳

邊間係世界冠軍球會？今日就知答案！世冠盃決賽戲碼一如所料，由南美冠軍哥連泰斯大戰歐洲班霸車路士，車仔近期重返正軌，費托更加係鹹魚翻生，配合中前場一班腳法細膩嘅發電機，車仔比守強攻弱嘅哥連泰斯更有森巴味道，今晚一於撐車路士開W，稱霸世界啦！

（有線61及201周日晚6:30直播）
華麗中場線好睇又好食

車路士近期表現脫胎換骨，最大原因肯定係「王子」費蘭度托利斯全面復甦，呢位由開季一直畀人鬧唔識入波嘅西班牙前鋒，近3場比賽一口氣狂轟5球，信心同士氣都返晒嚟，賓尼迪斯真係可以幫佢踢番以前喺利物浦嘅水準，唔到你唔信！

係，人人都狂鬧賓尼迪斯唔係好領隊，不過佢上任之後，車路士嘅防守真係穩陣咗好多，而且肥賓嘅其中一個「德政」，就係冇夾硬拆散車仔條華麗中場線，去配合自己嘅突擊戰術，任由桑馬達、夏薩特同奧斯卡輪流後上，創造出最強鋒力！

當中阿占最欣賞係車仔嘅巴西鐵三角，大衞雷斯、拉美利斯同奧斯卡已經成為車仔嘅脊椎，今場用森巴兵制衡巴西對手，論卡士，哥連泰斯又何止低幾班吖？
哥連泰斯齋守冇森巴味

講真，依家呢隊哥連泰斯真係冇乜森巴味，反而似歐洲波玩控球穩守，佢哋喺贏南美自由盃嘅過程入面，14場波只係失4球，但鋒力唔見得有冠軍霸氣，上場贏艾阿里仲大打穩陣波，畀人感覺係進攻無力，事實上秘魯前鋒荷西古里路亦唔屬於頂級殺手，對住艾阿里尚且可以過骨，但對住攻強守掂嘅車仔就相當牙煙，今場梗係捧車路士最正路啦！

睇完車仔捧盃，當然唔好唔記得再晏少少有德甲歇冬戰，睇埋今晚德甲直播就要再等一個月囉，各位球迷，今晚記住捧場喇！
世冠盃勁旺歐聯盟主

‧歐聯盟主連續5屆捧走世冠盃。

‧哥連泰斯上仗只得1次中目標射門，遠較車仔5次為低。

‧車仔近9場作客8開入球大，上仗更輕取蒙特雷3:1。
撐埋車仔「讓球客勝」

南美洲代表哥連泰斯同歐洲班霸車路士，如果唔係世冠盃，相信都好難會見到佢哋對壘。呢場波冇對賽往績可尋，不過歐聯冠軍自07年起連續5屆封王，可見歐洲球會實力仍凌駕於南美洲球會之上，而且哥連泰斯上場對艾阿里只得1次中目標攻門，相反車路士勒住照贏蒙特雷3:1，表現對辦，嫌1.65倍客W冇味，不妨冷吼2.8倍「讓球客勝」。
世冠盃賽制

冠軍戰法定時間內和波即加時30分鐘，仍未分出勝負則互射12碼決勝。季軍戰若法定時間打和，直接互射12碼決勝。
頂占筍盤：車路士（客勝）