切爾達兵疲難抗「迪」

猪拉多纳

今晚西甲有兩場賽事上演，其中切爾達主場迎戰貝迪斯就會守尾門。雖然切爾達喺上周中西班牙盃爆冷擊敗皇馬2:1，士氣提升唔少，但對住有射手魯賓卡斯度坐鎮嘅貝迪斯，想贏波已經唔易，仲何況要讓一球，寧捧1.85倍「讓客」仲好。

（now632台周二凌晨4:30直播）

「升班球隊」切爾達秉承一貫弱隊主場搶分嘅特點，開季7戰攞到3勝3和1負，但查實主勝率連一半都冇。最慘係佢哋上周中先同皇馬惡戰完90分鐘，球員回唔回得切氣都成問題，體力肯定比只派副選出戰西盃嘅貝迪斯輸蝕。加上近4次對賽，切爾達無論主客都踢成1:1平手冇任何甜頭可言，今晚要讓波似有暗湧！
貝迪斯魯賓卡斯度腳風順

貝迪斯上輪聯賽雖以1:2不敵巴塞，但全場不落下風，如果唔係多次中柱中楣，應可喺「地上最強」身上搶到分，輸波可以話雖敗不辱。其實貝迪斯今季表現脫胎換骨，同射手魯賓卡斯度着晒火有莫大關係，呢位西班牙箭頭近8場射入8球，仲連續4場有士哥，可以話係球隊搶分之匙！更重要係貝迪斯僅以得失球差不及馬拉加暫列第5位，大有條件喺下屆歐洲賽亮相，試問班球員落到場點會唔搏命！