國米出小將照炒乙組仔

猪拉多纳

意大利盃16強，國際米蘭主場對乙組仔維羅納，國米教練施特拉馬斯安尼鍾意喺盃賽起用年輕球員，但唔好睇小呢班生牯仔，佢哋經過今屆歐霸盃歷練，展示出上佳質素，轉戰意盃綽綽有餘。最重要係小將要爭取表現博上位，絕對唔會留力，炒得起維羅納，要「讓球主勝」。

（now 633及660周三凌晨4時直播）

國米教練施特拉馬斯安尼今屆歐霸盃多數派年輕球員上陣，仍然輕易出線，證明呢班小將唔嘢小。19歲嘅克羅地亞前鋒馬高利華查喺歐霸盃已有四球進帳，20歲中場菲臘比古天奴更入選過巴西國家隊，質素毋須懷疑。由於佢哋平時聯賽欠缺上陣機會，更加要把握踢盃賽表現自己，希望成為常規主將，今仗遇上低組別嘅維羅納，正係表演時間。
維羅納盃賽唔會搏

維羅納已沉淪意乙多年，難得今季可位居前列，首要目標爭升班資格，估計對意盃興趣唔大。加上球隊級數遠低於國米，球員對晉級期望唔慌大，人腳實力及心理質素都輸蝕下，大敗唔奇。