拜仁超班大炒「格」

猪拉多纳

開P減壓 踢走失分鬱悶

功虧一簣，唔能夠打破德甲半季積分紀錄嘅拜仁慕尼黑，今晚喺歇冬前嘅最後一戰，德國盃第3圈出訪弱旅奧格斯堡，再無後顧之憂，憑住超班實力，加上「餓波殺手」馬里奧高美斯嘅出色把握力，睇怕唔難大勝一場，力奇捧1.55倍「讓球客勝」。

（無綫翡翠台周三凌晨3:30直播）

拜仁上周五喺聯賽僅能踢和慕遜加柏1:1，錯過造出新紀錄機會，不過力奇認為和波正好提醒佢哋咪畀勝利沖昏頭腦，嚟緊必須搏命踢好每一場波。失分之後，上周末佢哋就拉隊搞咗個聖誕Party，好似馬里奧高美斯咁，個個都執到靚靚仔仔咁出席，守將拿菲爾仲大膽到唔理贊助商Audi，唔怕受罰揸架紅色法拉利到場，似乎大家都已經將失分嘅鬱悶拋開，今晚德盃一於等睇佢哋好戲啦！
奧格斯堡狀態衰到貼地

講番陣容，除咗洛賓續抖之外，雖然西班牙兵查維馬天尼斯上仗又畀人打傷左眼或會缺陣，不過搵嚟烏克蘭國腳泰摩斯卓克頂住防中位都一樣掂！最重要係，傷愈復出冇耐嘅馬里奧高美斯今仗有望擔正出擊，佢今季上陣7次，只得1次係正選，都一樣錄得3個入波，證明狀態唔差，趁住爭位踢嘅文迪蘇傑近排大鬧入球荒，今晚高美斯梗係要「騷哥利」啦！

奧格斯堡呢邊，今年11月至今8戰竟然1場都未贏過，狀態衰到貼地。佢哋今仗會繼續有防線主力華希亞治同門將贊斯缺陣，防守力信唔過o架。力奇搵過資料，原來奧格斯堡對上一次贏拜仁，已經要倒數返去1961年，之後成50年雙方9次交手全部由拜仁贏晒，「奧堡」今晚想輸少球都難啦！