多蒙特攞「威」過冬

猪拉多纳

德國盃買重「保險」

今晚繼續上演德國盃16強，重頭戲多蒙特主場迎戰漢諾威。上季德甲及德盃雙料冠軍多蒙特今季成績走樣，聯賽衞冕近乎夢碎，必然更落力爭盃賽，以免四大皆空。漢諾威防線中門大開，加上歇冬假期在即，心情有所鬆懈，抵擋唔住「蜜蜂兵團」狂攻，主W熱爆有道理，建議直取多蒙特「讓球主勝」。

（無綫翡翠台周四凌晨3時30分直播）

多蒙特喺聯賽已落後榜首拜仁慕尼黑12分，反超前機會微乎其微，佢哋下半季會集中火力爭歐聯及德國盃。不過捧歐聯難度非常大，「蜜蜂兵團」應會「買保險」，全力爭德國盃，就算歐聯出局，都有個錦標向球迷交代。加上今仗對手係同屬甲組嘅漢諾威，預料多蒙特會強陣出擊。
漢諾威失波第二多

事實上，只要多蒙特出真功夫，無懼任何球隊來犯，進攻鐵三角馬里奧葛斯、馬高列奧斯及羅拔利雲度夫斯基入球產量相當高，三人今季聯賽共攻入22球，強如皇馬到訪都俯首稱臣，更何況漢諾威。

睇好多蒙特可以大勝，除因為佢哋有鬥心、火力強之餘，仲由於漢諾威防線弱不禁風，佢哋係德甲上半季失波第二多球隊，作客更平均每場失兩球，遇上中前場人腳鼎盛嘅多蒙特，實在難有運行。踢完今場比賽，德國波就會進入歇冬期，漢諾威欠缺爭標野心，恐怕球員心理上已提早放假，淨輸兩球或以上好合理。