車仔疲兵難破列斯聯

猪拉多纳

世冠喪師匆匆轉戰英聯盃

車路士失意世冠盃後匆匆趕返英倫出戰英格蘭聯賽盃，八強戰作客英冠球隊列斯聯繼續備受追捧，英超快車期將至，車仔教頭賓尼迪斯無可避免要行輪換制。列斯聯接連踢走英超對手，非常硬淨，受讓博2.1倍「讓球主勝」！

（周四凌晨3時45分開賽）
列斯接連踢走英超兵

車路士於世冠盃決賽不敵巴西球隊哥連泰斯，王子費蘭度托利斯再成敗家仔，累到契爺賓尼迪斯未能捧盃攞威，兩仔爺繼續成為車迷辱罵對象，適逢上任車帥迪馬堤奧於瑞士獲頒年度最佳領隊獎項，相信賓尼迪斯特別難受。車仔山長水遠去到日本作賽，啱啱返到英倫冇耐又要踢英聯盃，嚟緊仲要應付亡命快車期，「肥賓」唔敢搏殘班主力，預期隊內二線兵馬高馬連及賴恩貝特蘭等有機會落場，戰鬥力點都要打折扣。

列斯聯位列英冠中游，計級數肯定輸蝕，不過，呢班波今屆喺聯賽盃表現理想，晉級過程先後踢走英超球隊愛華頓同修咸頓，明顯打盃賽特佳，今次對住殘「車」被睇低，但絕對有條件製造爆冷賽果。車路士有心爭盃，可惜現時隊內氣氛麻麻，打完世冠盃作客讓波好牙煙，「讓球主勝」博得過！賽事法定時間打和加時30分鐘，再和互射12碼決勝。