好主意補出建奇功

猪拉多纳

上季有唔少馬後備補出馬建功，估唔到今季嘅後備馬演出都唔曳。前日苗禮德嗰隻「神州八號」退出，由鄭俊偉嘅「好主意」入替，呢隻四歲新西蘭馬上鋪已經喺泥地跑近，今次轉咗跑田草千六米，一樣吸引唔少捧場客，閘前仲落到得番6.6倍嘅綠格，結果真係飛到馬到，殺低咗隻大熱門「時來風送」，終於打開勝門，而馬偉昌就靠「勝風」、「好主意」同埋「同個世界」完成帽子戲法。
       
好主意後備補上飛到馬到。

其實馬偉昌尋日騎到「好主意」都有啲運，事關鄭俊偉賽後講呢隻馬上鋪喺泥地本來好有贏面，韋達話如果唔係馬鞍滑移已經贏咗，所以一早卜定嚟騎，點知今場做咗第一後備，韋達自然騎唔到，點知後備補出就益咗馬偉昌冷手執個熱煎堆。
       
（左起）馬偉昌、鄭俊偉

鄭俊偉覺得「好主意」喺四班有啲超卓感，贏馬唔意外，既然依家贏咗場田草千六米，日後都會集中喺呢個路程攞成績。