悉尼操Fit 頂得住水手

猪拉多纳

FC悉尼今午喺主場對中岸水手嘅新南威爾士打吡，賽前備戰將成為勝負分野！水手上場作客鳳凰後，因為航班取消滯留當地，連帶其後嘅訓練都受影響，相反FC悉尼為咗洗雪季初大敗恥辱，日日操足力求谷底反彈，相信佢哋至少可以保住不敗，受讓撐2.15倍「讓主」。

（有線64及204周四下午4:30直播）
中岸水手遲復操狀態成疑

中岸水手上場山長水遠作客威靈頓鳳凰後，原本諗住隨即返大本營備戰，點知因大霧關係，被迫滯留喺新西蘭一日，連帶聖誕嗰課操練都冇埋，索性畀班球員放假，直至尋日復操一課就再度客場作戰，狀態本來已經成疑問，最弊係中堅柏迪保積仲要黃牌夠數坐波監，仲點樣信得過先？

另邊廂，悉尼後衞法比奧艾維斯雖然上場受傷退下火線，今日未知落唔落到場，但係入替佢嘅尼敦舒亞洛克表現唔錯之餘，仲話今場如果成功擊敗「一哥」水手的話，會係帶領球隊重返正軌嘅催化劑。事實上佢唔係得把口講o架，事關班波喺聖誕期間真係日日操足，矢志為季初大敗2:7一雪前恥，就連中場居連拿都復出埋，同射手迪比亞路拍住搵食，陣容、鬥志、備戰瓣瓣有，身處榜尾一樣有權搶分。