利物浦大盤順「Q」

猪拉多纳

英超「聖誕新年快車」嚟到第三輪，賽程密集勝負本已惡估，利物浦又神經刀癲到暈，捧大最好！紅軍後防弱不禁風，已連開四口大，近三聯賽作客狂失七粒。昆士柏流浪主場出擊求勝心切，雙方瘋狂搏拳下，入波唔會少。

（有線300及200台周一凌晨零時直播）

論英超衰波，利物浦認第二冇人敢認第一。近期紅軍場場嚇你一驚，月頭作客韋斯咸冇蘇亞雷斯，被一致睇淡下反勝韋斯咸，之後主場對阿士東維拉就突然輸得肉酸。前仗贈富咸四蛋後以為好醒，跟手對史篤城又反輸1比3。一日唔落場踢，你永遠唔會知紅軍搞邊科，今仗開主客和都得，不如轉敲大細盤。

曾幾何時，紅軍防守滴水不漏，連拿被公認為英超最佳門將之一，但本季再冇神救，對手一射中幾乎就有。一對中堅丹尼爾艾格、史卡迪爾唔夠硬淨，無論對手係快速矮仔，抑或大隻高佬，基本上佢哋都冇十足把握箝制對手。領隊羅渣士戰術又有前冇後，面對反擊時後防空虛，難怪失波好似倒水咁倒，本季九場作客聯賽，僅得一場能保持清白之身。
昆士柏施斯倒戈醒神

今場神鋒蘇亞雷斯已傷愈可以披甲，隊長謝拉特又弗番，加上球隊侵略性夠，昆士柏好難頂得住。雖然位處榜尾，但QPR踢法偏向技術型，啱晒紅軍發揮。QPR連輸兩場後，主場出擊肯定喪攻求勝，而施斯、泰拉拔都大勇，前者每次倒戈都分外落力，仲記得上季QPR就靠佢入波追平，最後仲反勝利物浦3比2，今場雙方料快打快鬥攻，大盤有分頭值得留意。