QPR開入球騷告別2012

猪拉多纳

利物浦防線唔掂

今晚英超爆發辭歲「頹軍大戰」！包尾嘅昆士柏流浪於主場迎戰專幫弱隊破紀錄嘅利物浦。論狀態雙方都係不外如是，不過「QPR」主場甚少冇波入，對住識攻唔識守嘅「紅軍」，1.85倍入球大絕對捧得過。

（有線200、300及廣東體育周一凌晨0:00直播）

利物浦上場大敗畀史篤城1:3，搞到隊波再次烏雲蓋頂，該戰「紅軍」除咗終於獲判今季首個12碼之外，基本上冇任何亮點可言，喺上場敗仗踢足全場嘅年青中場舒維爾，更因為表現唔好，喺twitter畀球迷喪插，結果唔開心到直情刪除咗個帳號，查實佢只得20歲，單係一場演出差就連自己球迷都唔撐，分分鐘影響埋全隊士氣。

更大鑊嘅係「紅軍」防守出現咗大問題，佢哋上季失咗40球算不過不失，但今季只係到一半，失球數字已經去到26球，自前任助教奇勒過檔西布朗後，丹尼爾艾格同史卡迪爾呢對中堅拍檔演出亦遠不及上季穩定，就連火力唔算強嘅阿士東維拉同史篤城，都可以喺利物浦身上創下整季首次攻入超過2球嘅紀錄，有施斯倒戈嘅昆士柏流浪都可能做得到o架。
蘇亞雷斯入球有保證

昆士柏流浪呢支榜尾大幡，改由夏利列納領軍後戰績仍然低迷，連會長費爾南德斯都喺twitter被球迷圍攻，但佢就話有信心戰績會慢慢回升，今場一於喺「紅軍」身上入多幾球攞多啲信心啦！至於利物浦亦有唔理任何環境都戰意十足嘅蘇亞雷斯壓陣，唔擔心今戰會係悶戰一場。
昆士柏流浪主場火力強

‧昆士柏流浪開咧至今僅1勝。

‧昆士柏流浪近8次主場都有入波。

‧蘇亞雷斯獨力攻入紅軍今季39%嘅入球。

‧利物浦今季19戰僅得25分，係改行3分制以來球會最差戰績。
博蘇亞雷斯又攞黃牌

自從達寧近期獲重用之後，利物浦已經好少由蘇亞雷斯開角球，所以玩「哨牙蘇」嘅先發項目，來來去去都係被罰黃牌、入球同冇事發生，睇番呢位「紅軍」7號射手近期表現，近4次出戰英超竟有3場領黃牌，今場不如博佢又賴多次嘢。