雪藏聖卡斯3守將打柴 「散沙艦隊」難讓皇蘇

猪拉多纳

新一年，新開始？弊在對皇家馬德里嚟講，2013年似乎只會愈搞愈亂！呢支「散沙部隊」今晚喺西甲主場迎戰近況大勇嘅皇家蘇斯達，有傳莫連奴會繼續玩針對唔用卡斯拿斯，況且一眾守將非傷即停，防線不堪一擊，小妹唔覺佢哋讓得起皇蘇2球囉，捧2.42倍「讓球客勝」！（now632台周一凌晨0:00直播）
干查奧練波違規被罰錢

原本小妹都以為皇馬歇完冬可以從頭嚟過，點知家陣連「葡萄牙幫」嘅法比奧干查奧都唔聽莫帥支笛，新年第1課操練就因紀律問題被球會罰錢，用「成盤散沙」嚟形容「銀河艦隊」最好不過！

最重要係皇馬喉舌、西班牙《馬卡報》亦爆莫連奴極有可能漠視近8成粉絲想卡斯拿斯復出嘅民意，繼續喺聯賽棄用呢位隊長門神，淨係留番西班牙盃畀佢踢，加上中堅比比同左閘馬些路都養緊傷，沙治奧拉莫斯又話要停賽，條防線天殘地缺，如果仲係由阿丹頂上把關，想唔失波都幾難！
弗爆皇蘇近8戰不敗

皇馬早前頹到喊，有唔少對手已經發現佢哋根本唔係上季嗰隊「銀河艦隊」，對賽心態由死守轉為對攻，放開去踢，自然搶到分啦！皇蘇嘅艾路斯當度、蘇魯圖沙同皮亞圖仲講明，今晚即使作客巴拿貝，仍然會踢進攻足球搏一鋪，至於首次對皇馬嘅前鋒伊法蘭仲話要入波添：「如果可以喺新一年對皇馬入波就太好喇！」皇蘇家陣眾志成城，配合近8戰不敗勇態，小妹相信佢哋對住「內亂成災」嘅皇馬，就算輸都唔會輸得難睇囉。
雙「皇」旺開「半和」

‧連西盃及歐聯去計，皇馬近10次主場賽事有7場開出入球大。

‧皇馬近8場賽事中，有5場未能開出「讓球勝」。

‧連盃賽在內，兩軍近8戰均有5次開出「半場和」。