路飛東廐近六年最冷Ｗ

猪拉多纳

尋日賽事韋達同潘頓兩位高手齊齊缺陣，果然全日大放冷氣，其中第四場東廐隻「路飛」仲係初出馬身份爆56倍，百分百無路捉！
       
路飛初出一鳴驚人。
取名「海賊王」主角

唔少馬迷賽前拎起排位表都話「路飛」個馬名幾過癮，原來馬主林承毅（「齊勝」馬主林文燦之子）係後生仔，佢話幾鍾意睇日本漫畫「海賊王」，「路飛」就正正係漫畫嘅主角，首次上陣就為佢贏出養馬以來第一Ｗ，睇嚟都幾旺佢。
       

而「路飛」嘅鞍上人李寶利尋日有位老友入場打氣，果然有料到。此子近來騎出信心，繼早前贏40倍既「天賦傳奇」之後，今次又爆56倍「路飛」，仲破埋東廐近六年最冷Ｗ紀錄，認真唔講得笑！