拉素主場碌「卡」追債

猪拉多纳

意大利盃八強賽事，率先上演拉素主場對卡坦尼亞。拉素大約兩個月前作客卡坦尼亞慘吞四蛋，今次喺盃賽碰頭拉素有番主場之利，整個局勢就唔同晒。實在拉素已保持多場不敗，加上今季主場成績極之理想，預料今場拉素會把握有利條件進行報仇，以發洩聯賽吞四蛋之恨，主W可留意。

（now 633及660周三凌晨4時直播）

拉素歷史上曾五度奪得意大利盃，可見球隊對盃賽有幾重視。既然有心求勝，拉素喺人腳編排時就唔能夠太保守，高路斯、列迪斯馬及靴蘭尼斯等主力成員，今場都會放入正選行列。教練柏高域賽前表示球迷及老闆都對意大利盃相當渴求，派出太多副選落場驚畀人鬧喎！
卡坦尼亞未回氣

卡坦尼亞剛賽對拖連奴都踢得幾辛苦，事關卡坦尼亞一早有球員領紅離場，於十人應戰下能賽和對手已相當難得。不過當晚球員耗力情況嚴重，經過短暫休息又要出戰盃賽，擔心卡坦尼亞球員於體力上未必應付得來，客隊疲兵出戰，開出主W機會較高。