光輝患「入波恐懼症」撐阿德

猪拉多纳

今日澳職上演一場「最強對最弱」戲碼，由主場火力冠絕聯賽嘅阿德萊德聯，迎戰作客死火、場均連半球都冇嘅珀斯光輝，梗係撐識入波嗰隊啦，撐2.03倍主勝。

（有線64及204周五下午4:30直播）

阿德萊德聯主場8戰6勝成績標青，攻入16球更係澳職之冠，雖然早前作客畀西悉尼流浪者炒六個一皮士氣受挫，跟手主場金身仲畀布里斯班獅吼打破埋，不過佢哋話咁快就重拾信心3球淨勝FC悉尼重返勝軌。陣容方面，卡路斯卡因腹股溝傷患要抖2至3個星期，不過有維度錫呢位首席射手兼中場核心派牌，影響唔算太大。
7場作客僅入3粒

至於喺主場搶唔少分嘅珀斯光輝，作客就真係不敢恭維，打7場輸5場唔在講，最弊係班波好似有「入波恐懼症」咁款，至今淨係入得嗰3球，除番開每場平均連半球都冇。況且季初對阿德萊德聯替球隊先開紀錄嘅美梅特轉戰泰國，首席射手史美斯作客仲未開齋，後衞特威迪又因腳傷缺陣，今場真係輸少當贏。