曼聯狂炸利物浦

猪拉多纳

雙紅會Ａ級斯殺

是日英超頭場上演全城矚目「雙紅會」，曼聯主場決戰利物浦，雖然「紅魔鬼」喺聯賽領先「紅軍」21分之多，但無損今場賽事重要及精彩程度。曼聯上下視利物浦為仇敵，趁對手走下坡更想踩多兩腳，依家佢哋仲有埋「紅軍殺手」尹佩斯，勝望極高，捧主勝！

（有線300及200台周日晚9時30分直播）

曼聯同利物浦○八至○九季度喺聯賽爭冠爭崩頭，三年幾過後，「紅魔鬼」仍處榜首爭冠，「紅軍」喺中游苦苦為歐洲賽席位而戰，距離愈拉愈遠。不過，「雙紅會」始終都係英超A級戲碼，曼聯主帥費格遜話鬥利物浦有如打吡戰，呢點永恒不變，上季曼聯守將艾拉同對手前鋒蘇亞雷斯搞單歧視門事件，今季兩隊首循環碰頭又有「紅軍」利物浦小將舒維爾被逐鬧鬼老費，真係鑊鑊新鮮鑊鑊甘，想悶都難！
尹佩斯惡鬥蘇亞雷斯

今場超級大戰兩隊都唔想輸，咁就要睇吓邊隊本事啲喇，曼聯射手朗尼已復操，但未有足夠比賽狀態，頂多打後備，前線又係靠尹佩斯擔大旗，呢個荷蘭射手近六次對利物浦入五粒，包括首循環射入奠勝十二碼，堪稱「紅軍殺手」，佢今季一再喺關鍵時刻做英雄，今場都係球隊爭勝重要棋子。對於曼聯上下嚟講，有盃捧梗係開心啦，但睇住死敵利物浦沉淪同樣係一大快事，冇嘢好得過兩循環雙殺對手。
紅軍作客往績極差

利物浦都有個超級射手蘇亞雷斯在陣，呢個烏拉圭球星技術、射術同騙術同樣精湛，手腳都識入波，唔到你唔服，教頭羅渣士搵埋車仔前鋒史杜列治幫手，前線都幾有威脅。「紅軍」衰在有條恐怖防線，前線入埋唔夠輸，左閘荷西安歷基受傷休戰，一係翼鋒達寧頂替，再唔係安排格連莊臣改打左閘，點郁都係擇使。利物浦近8次作客奧脫福輸7場，近4次仲輸晒，完全冇得揮，睇怕今次都係難望復仇。