兵工廠留禾仔最佳禮物

猪拉多纳

今晚英超又安排咗超級星期天！頭場先有曼聯對利物浦，同時仲安排有３Ｄ直播，打後仲有阿仙奴對曼城，鍾意睇英超嘅球迷真係要買定薯片花生睇大戰，小妹就比較鍾意大炮阿仙奴多啲！

雲格一直唔肯出高價買人，廠迷都已經習以為常，但傳聞禾確特居然可以打破傳統，以高薪續約留効，對於廠迷嚟講呢份新年禮物仲好過買乜嘢超級巨星啦！有埋狀態嘅禾仔，阿仙奴攻擊能力猶如倍增，佢哋近八戰場場有波入，論往績曼城作客兵工廠都無啖好食，近六季從未贏過，六場波只入一球。數據你都可以淨係話嚟參考，但曼城傷停名單嚇死人，倒戈嘅拿斯尼停賽、連同高拉洛夫、阿古路都受傷，高路托尼及球隊核心耶耶托尼都飛埋去踢非國盃，曼城以天殘地缺陣撼阿仙奴實在唔多睇好，今場平手盤真係唔支持雲格教授都唔得啦！

（有線300及200台周一凌晨零時直播）