阿仙奴 曼城壓軸「大」戰

猪拉多纳

禾哥+王子撼阿根廷野獸

今晚英超連場好戲，除咗頭場「雙紅會」，仲有阿仙奴喺主場迎戰曼城做壓軸。雲格近期將禾確特改造成箭頭，效果理想，而且「禾哥」仲有普多斯基做支援，火力超勁，另邊廂曼城又有傾緊續約嘅「野獸」泰維斯數胡，呢3大射手勢必鬥騷哥利，1.68倍入球大抵捧！（有線200及300、廣東體育周一凌晨0:00直播）

禾確特改踢前鋒後，極有亨利嘅影子，當然，「禾哥」仍然有好大嘅改善空間，但基奧特受傷，禾確特嘅快速踢法的確好啱打，咪忘記「王子」普多斯基踢番翼鋒，狀態全面回勇，有佢哋壓陣，阿仙奴想入少粒都難。對家曼城前鋒巴洛迪利又發癲，仲衰到同文仙尼講手，不過都好嘅，文仙尼正正路路用番泰維斯攻堅，起碼係入波保證先吖！
兵工廠門神係計時炸彈

除咗鋒線，張峰認為雙方嘅西班牙中場對決同樣係焦點所在。先講辛迪卡索拉，左右腳純熟、長傳準確、閱讀球賽能力高，可以話係今季「兵工廠」最佳收購；大衞施華踢法細膩，擅長喺禁區頂做傳送。論發揮空間張峰覺得施華仔較大，始終施華仔身邊係一班世界級球員，而且合作時間較長，配合起嚟會比較得心應手。

講到尾，雙方嘅防線都唔算穩健，曼城全民皆攻，後防成日暴露空位，門將赫特身手再好，都救唔到曼城好多次，對面嘅阿仙奴門將施捷斯尼把關亦唔見得好穩健，隨時係計時炸彈。今晚撐一撐個入球大，等睇入球Show啦！

張峰來料：阿仙奴（入球大）