美斯金靴亮相省爆馬拉加

猪拉多纳

周日西甲壓軸大戰，由目前西甲失波最少嘅馬拉加惡鬥「地上最強」巴塞隆拿，前者防守睇落好似密不透風，但卡爾萬覺得實情係因為佢哋仲未經歷過巴塞嘅進攻火力洗禮，縱然今晚有主場之利，對住有「球王」美斯復出嘅「地上最強」，失球數字隨時激增，巴塞1.97倍「讓客」係信心之選。（now632台周一凌晨4:00直播）

巴塞繼歇冬後首戰對愛斯賓奴派4蛋，上周中西班牙盃收起8件主力，照樣大炒科爾多瓦5粒，勇勢持續。今晚除咗養精蓄銳嘅美斯、沙維同恩尼斯達等會正選披甲外，入球突破60大關、火力冠絕5大聯賽嘅巴塞，仲有望創下西甲史上開季最佳成績，兼為主帥維蘭路華抗癌打氣嘅重任喺身，鬥心肯定爆棚。
巴塞作客至少贏馬拉加兩粒

至於目前喺西甲只係失咗13球嘅馬拉加，相比起巴塞仲要少6球，防守相當硬淨，不過有點值得留意嘅係，佢哋當中有9球都係喺主場所失，證明並非牢不可破。再者佢哋個正選右閘捷西斯加美斯今場坐波監，防線實力削弱，對上4次主場遇着巴塞又至少輸兩球，今晚仲要對住着上紀念金靴亮相嘅美斯，聽做炮灰啦！