漢諾威趁亂搶分

猪拉多纳

史浩克新帥冇料到

德甲重開，史浩克今晚喺主場對漢諾威，話唔埋會失分，事關史浩克教頭史堤芬斯喺歇冬期間就突被炒魷，頂替佢嘅新帥贊斯基拿執教經驗極淺，漢諾威有機會趁亂開2.15倍「讓客」。

（有線61、64、201及204、廣東體育周六凌晨3:30直播）

雖然史浩克射手亨特拉爾獲得650萬歐元年薪續約，不過呢位荷蘭射手今仗要坐波監，而翼鋒阿費利喺歇冬期間練波受傷，即使有哈化柏林中場拉菲爾基達奴加盟頂上，似乎都補唔番條數。

更弊嘅係，史浩克高層又發神經，突然解僱教練史堤芬斯，但又請唔到有料新帥，只有死死氣咁安排原屬青年軍教練贊斯基拿接手，睇怕下半季戰績隨時會大倒退。點解咁講？因為贊斯基拿主要帶領青年軍多，唯一帶領甲組隊經驗係2010年執教史特加，弊在上任兩個月就因為戰績太差慘食冇情雞，旨意佢帶領史浩克翻生，真係蛇都死。

對家漢諾威歇冬期間增兵行動非常積極，先後簽入哥列迪巴中場法蘭卡、杜伊斯堡中場安德里荷夫曼同阿仙奴中堅佐羅，目標唔似係護級咁簡單，相信領軍倒戈嘅教練史隆卡有辦法製造冷門賽果！