馬賽掃雷玩大穩過W

猪拉多纳

法甲頭場直播賽事，雷恩主場對馬賽，雷恩連盃賽兩連勝狀態不俗，不過佢哋近年對馬賽經常被剋死，過去九次碰頭只贏過一次，今場平手盤都冇着數。馬賽歇冬後兩場聯賽都同對手鬥攻出現大手交易，續追大盤係明智之選。

（now 714周日凌晨零時直播）
雷恩遇剋星似撞邪

雷恩兩連勝兼冇失波，平手盤睇落好着數，不過佢哋近年對馬賽都好似撞邪咁，近九次聯賽碰頭只得一勝三和五負，其中四次主場更加未贏過，睇往績真係捧唔落手。

何況中場主力馬維拿已落實轉投俄超魯賓卡山，域陀蒙坦奴、比度巴有傷在身，前鋒卓克迪亞拉及後衞約翰保耶亦要出戰非國盃，陣容不整戰鬥力料再打折扣。

馬賽方面亦有中場卡保尼、卡迪亞及後衞施拿文高踢非國盃缺陣，不過中前場主力阿休、基格納交到功課，能夠彌補連續兩場共失五球嘅甩漏。不過，考慮到馬賽上次作客下游隊伍索察都意外落敗，演出水準好唔穩定，平手盤捧佢哋亦有戒心，不如索性繼續追大盤。