不來梅漢諾威「大」鬥法

猪拉多纳

德甲爆騷雙王士哥娛賓

德甲獨腳戲上演北方打吡，雲達不來梅主場鬥漢諾威，雙方有前冇後踢法如出一轍，近期防線演出同樣慘不忍睹，今晚對碰預咗係癲鳳鬥狂龍嘅入球騷，1.45倍入球大係過關重心。

（有線64及204台周六凌晨3時30分直播）

兩軍各自近10場聯賽有8場開大，開細嘅兩場都同樣有兩個入球，雙方經過19輪聯賽後各失37球，只有賀芬咸失波比佢哋多，不來梅歇冬後兩仗入2球共失8球，漢諾威兩仗入6球亦失6球，全數比賽都開大收場。

不來梅主帥舒哈夫係進攻足球保衞者，球隊今季經過換血後注入咗好多年輕球員，防線默契同級數都不足，勉強進攻只會失得更多，近9場聯賽只贏過態沉弱旅杜塞爾多夫同賀芬咸，整體水準下滑嚴重，上仗北部打吡作客2比3不敵漢堡，仲有隊長富斯同攻擊手阿拿奧杜域被逐，今仗雙雙停賽，唯一好消息係中場大將肯特復出領軍。
兩軍大盤率高博「7+」

漢諾威作客曳但唔肯放棄進攻，今季9場作客輸咗7場，當中有8場開出大盤，今晚仲有9名主力唔出得，除咗一大批老傷兵外，中場新星荷夫曼同上仗首度登場嘅新援左閘保高洛尼雙雙停賽，中堅艾治文亦加入傷兵行列，數據同賽前消息睇見都唔開胃，不過黑柴覺得即使咁殘陣，今場人腳比起不來梅都唔輸蝕，起碼前線馬美迪奧夫、艾度拿奧爾、舒拿達夫同侯斯迪狀態比不來梅鋒將更Sharp醒。除入球大，博好分頭可敲13倍嘅總入球7+。