不來梅漢諾威鬥衰博和

猪拉多纳

今晚德甲獨腳戲上演「霉友大激鬥」！由雲達不來梅迎戰漢諾威，雖然已經踏入2月，但不來梅喺2013年仲未贏過波兼有唔少主力受傷停問題困擾，至於漢諾威上仗踢少個照贏波，但就元氣大傷，家陣傷停名單啱啱好砌番一隊正選出嚟，衰鬥衰都係敲3.7倍和啦！

（有線64及204周六凌晨3:30直播）
近4戰不勝攻守都唔掂

身為德甲傳統勁旅之一嘅雲達不來梅，家陣已經淪落到喺中下游浮沉，佢哋唔止近4場聯賽都未贏過波，踏入新年後嘅兩場聯賽仲要勁失8球，經已成為2013年最霉嘅德甲球隊之一，本身前鋒富克洛復出可以為前線注入活力，點知佢早前喺操練中再次受傷，呢場肯定缺陣，加埋最穩陣嘅中堅富斯同埋主力射手阿拿奧杜域都喺上仗食紅牌，今場齊齊停賽，前面攻唔掂後面又守唔穩，拎到1分都偷笑啦！
鬧兵荒可砌「傷停11人」

漢諾威上仗大部分時間踢少個之下擊敗禾夫斯堡，「打甩門牙帶血吞」嘅表現唔止教練史隆卡，連小妹都拍爛手掌！不過大戰過後，史隆卡手上唔踢得嘅球員可以砌成「傷停11人」，除咗菲臘比查維辛等長期傷兵外，中場艾治文上場搞到腳踭骨裂有排抖，後衞保高洛尼同埋安德里荷夫曼都要停賽，唔好忘記耶高蘭都踢緊非國盃，唔怪得教練史隆卡都勁無奈咁話：「我哋嘅缺陣名單真係太誇張喇！」就算近4場入4球嘅馬美迪奧夫繼續孭飛，咁嘅陣容唔係諗住作客贏到波下話？