多蒙特托弗利華頂唔住

猪拉多纳

德甲第二十輪由利華古遜主場對多蒙特壓軸，聯賽榜二、三哥對決，不過無論計卡士同狀態，排緊第三嘅多蒙特都勝利華古遜一籌，呢支衞冕冠軍今晚作客讓得起平半，黑柴捧多蒙特上盤。

（有線61及201台周一凌晨零時30分直播）

多蒙特歇完冬簡直着晒火，先後大炒雲達不來梅同紐倫堡，兩仗共入八球保持不失，認真銳利。事實上多蒙持上半季十七場聯賽只有四場保持不失，但球隊踏入下半季防線明顯更加穩健，加上波蘭翼鋒巴拉斯塞高斯基擺脫傷病回復佳態，球隊中前場組織更加流暢。多蒙特目前情況就同上季一樣，上季佢哋歇冬後聯賽7連勝，現階段相信亦冇乜球隊可以抵擋，今仗一樣有把握全取三分。
利華古遜踢法欠靈活

利華古遜甚少失準，不過佢哋嘅「4321」陣式穩定有餘，但三防中配置令球隊靈活不足，遇上踢法機動，搶拚積極嘅球隊就會綁手綁腳，單箭頭傑斯寧歇冬後仲未搵番射門觸覺，上仗面對踢法同多蒙特近似嘅弗賴堡即冇晒贏波板斧，黑柴相信多蒙特可以作客贏波，搶番利華古遜嘅二哥位置。