國米大掃除錫耶納偷雞

猪拉多纳

周日晚係意甲主要賽期，阿King揀咗國際米蘭作客對錫耶納做重心。國米喺冬季轉會市場展開第二波清洗行動，似乎已落實為未來鋪路。國米為長遠發展進行針對性買賣，做法係相當之正面，不過，人腳大幅變動必對球隊造成短暫性影響，今場作客未必咬得入錫耶納。國際米蘭讓波風險高，「讓球主勝」較為可取。（周日晚10時開賽）

國際米蘭去年暑期已經放走一大堆球員，比如盧斯奧、施薩索拉斯及馬爾干等，估唔到佢哋喺今年一月繼續清洗，史奈達、菲臘比古天奴及馬列加都已經離開。好明顯國米換血行動唔係講笑，而新舊交替過程難免會影響球員之間嘅默契，發揮亦冇咁暢順，爭勝機會自然打折扣。

另外，國米近期作客成績差，連同所有盃賽及聯賽在內，「藍黑軍」近七作客一和六負未贏過，客戰冇運行，讓波必捧有主場之利嘅錫耶納。
熱拿亞繼續捱「細」界

同時間進行嘅意甲仲有熱拿亞主場對拉素，拉素近期喺意盃同祖雲達斯鬥個你死我活，球員體力成疑，對爭勝構成阻力。熱拿亞近況差劣，球員狀態不佳有待提升。兩隊都有缺點，預料今場入波唔會多，細盤可捧場。